„სკრინინგულმა კვლევამ ჩემი ცხოვრება გადაარჩინა!“ – ემილი გოგუას ისტორია, რომელიც ყველა ქალმა უნდა წაიკითხოს!
„აუცილებლად ჩაიტარეთ სკრინინგი, თუნდაც სრულიად უსიმპტომო იყოთ! მე ვარ ნათელი მაგალითი იმისა, თუ როგორ შეიძლება გადაურჩე კიბოს დიაგნოზს.“
დღეს ემილი გოგუა, შესაძლოა, ონკოპაციენტის მძიმე სტატუსით ცხოვრობდეს და ქიმიოთერაპიის თუ სხივური თერაპიის რთულ კურსს გადიოდეს. თუმცა, დროულად ჩატარებულმა სკრინინგმა მას კიბოსწინარე მდგომარეობის აღმოჩენისა და სრული განკურნების შესაძლებლობა მისცა.
დღეს იგი საკუთარ გამოცდილებას ათასობით ქალს უზიარებს და მოუწოდებს, საკუთარ ჯანმრთელობას მეტი ყურადღება დაუთმონ.
უსიმპტომო საფრთხე და ინტუიციური გადაწყვეტილება
ემილი გოგუა ის ადამიანია, ვისი ყოველდღიურობაც სხვების ბედნიერებასა და ზეიმს უკავშირდება. როგორც საქორწინო წვეულებების წარმატებული ორგანიზატორი და წამყვანი, იგი მუდმივად ყურადღების ცენტრშია.
„ჩემი ცხოვრება ძალიან მხიარული, საინტერესო და მრავალფეროვანია, თუმცა რადიკალურად განსხვავებული რეალობა მექნებოდა, რომ არა ერთ დღეს, სრულიად შემთხვევით, სკრინინგის დროს აღმოჩენილი კიბოსწინარე მდგომარეობა,“ – ამბობს ემილი.
ემილის არაფერი აწუხებდა. იგი სრულიად უსიმპტომოდ, ჩვეულებრივი რიტმით ცხოვრობდა. მარტის მიწურულს გადაწყვიტა, ადამიანის პაპილომავირუსის (HPV) საწინააღმდეგო ვაქცინაცია გაეკეთებინა. აცრამდე კი დაფიქრდა: ხომ არ სჯობდა, ჯერ გადაემოწმებინა, ბუდობდა თუ არა ვირუსი მის ორგანიზმში?
წინა წლის ოქტომბერში ჩატარებული ჩვეულებრივი „პაპ-ტესტის“ პასუხი სრულიად მშვიდი იყო – არანაირი საგანგაშო ნიშანი! თუმცა, ემილიმ იცოდა, რომ პაპილომავირუსს 200-ზე მეტი შტამი აქვს და მათ შორის განსაკუთრებით აგრესიულია მე-16 და მე-18 შტამები. მან გადაწყვიტა, პაპ-ტესტთან ერთად HPV ტესტიც ჩაეტარებინა.
შედეგმა ყველაფერი შეცვალა: პაპ-ტესტმა კვლავ აჩვენა, რომ „არაფერი სჭირდა“, თუმცა HPV ტესტმა დაადასტურა ყველაზე აგრესიული, მე-16 შტამის არსებობა. დამატებითმა კვლევებმა კი საშვილოსნოს ყელის მძიმე დაზიანება (კიბოსწინარე მდგომარეობა) გამოავლინა.
რომ არა ეს ინტუიციური გადაწყვეტილება, ემილი რამდენიმე წელიწადში უმძიმესი დიაგნოზის წინაშე აღმოჩნდებოდა.
საოპერაციო მაგიდიდან – პირდაპირ სცენაზე!
დაიწყო ბრძოლა, რომელსაც წამითაც არ შეუნელებია ემილის ცხოვრების რიტმი. საჭირო გახდა დაზიანებული ქსოვილის ლაზერული ამოკვეთა (კონიზაცია).
საოპერაციო მაგიდიდან წამოდგომისთანავე, ნარკოზიდან ახლად გამოფხიზლებული ემილი პირდაპირ საქორწინო ბანკეტის წასაყვანად გაემართა! სეზონის პიკი იყო და ღონისძიებას ვერ გადადებდა. მან გაიღიმა, სცენაზე დადგა და სხვისი ბედნიერების აღნიშვნა გააგრძელა მაშინ, როცა რამდენიმე საათის წინ საკუთარი სიცოცხლე გადაირჩინა.
ამოკვეთილი ქსოვილის შემდგომმა მორფოლოგიურმა კვლევამ დაადასტურა, რომ დროულმა ქირურგიულმა ჩარევამ საფრთხე სრულად გაანეიტრალა (დაისვა CIN 2 ხარისხის დაზიანების საბოლოო დიაგნოზი).
დღეს ემილი სრულიად ჯანმრთელია!
დღეს ემილი თავის მრავალრიცხოვან გამომწერებსა და საზოგადოებას უზიარებს რეკომენდაციებს, რომლებმაც შესაძლოა მათი სიცოცხლეც იხსნას:
ჩაიტარეთ HPV ტესტირება: განსაკუთრებით 30 წელს გადაცილებულმა ქალებმა – მხოლოდ პაპ-ტესტს ნუ დაეყრდნობით. HPV ტესტი მაღალმგრძნობიარეა და ავლენს ვირუსს მანამ, სანამ ის უჯრედებს დააზიანებს.
ისარგებლეთ სახელმწიფო პროგრამით: საქართველოში 25-დან 60 წლამდე ქალებისთვის საშვილოსნოს ყელის სკრინინგი სრულიად უფასოა! მიმართეთ ადგილობრივ პოლიკლინიკას და ჩაეწერეთ ოჯახის ექიმთან.
იცოდეთ ვაქცინაციის ძალა: პაპილომავირუსის აცრა ეფექტურია როგორც ქალებისთვის, ისე მამაკაცებისთვის. განსაკუთრებით მნიშვნელოვანია მოზარდი გოგონების აცრა, რათა მომავალში ეს საფრთხე თავიდან აირიდონ.
„გახსოვდეთ, სკრინინგი ჩვენი ჯანმრთელი და მშვიდი ცხოვრების გარანტია! ნუ დაელოდებით სიმპტომებს. საშვილოსნოს ყელის კიბოსწინარე მდგომარეობა ხშირად სრულიად უსიმპტომოდ მიმდინარეობს. დაუთმეთ ნახევარი საათი საკუთარ ჯანმრთელობას, რათა თქვენმა ცხოვრებამაც ისევე გაგრძელოს დღესასწაული, როგორც ჩემს შემთხვევაში მოხდა!“ – გვახსენებს ემილი გოგუა.
მისი მოწოდება განსაკუთრებით მნიშვნელოვანია იმ ქალებისთვის, რომლებსაც პროფილაქტიკური ვიზიტები დროის უქონლობის გამო გადაუდიათ ან მიაჩნიათ, რომ თუ არაფერი აწუხებთ, გამოკვლევაც არ სჭირდებათ.
ემილის ისტორია გვიჩვენებს, რომ ზოგჯერ ყველაზე მნიშვნელოვანი გადაწყვეტილება მაშინ უნდა მივიღოთ, როცა თავს კარგად ვგრძნობთ და საფრთხის არანაირი ნიშანი არ გვაქვს. ჯანმრთელობაზე ზრუნვა მხოლოდ მაშინ არ უნდა დავიწყოთ, როცა ტკივილი ან სხვა სიმპტომი გვაიძულებს, ექიმს მივმართოთ.
ემილიმ საკუთარი ისტორია გააზიარა, რათა სხვა ქალებსაც დაეხმაროს დროული გადაწყვეტილების მიღებაში. შესაძლოა, სწორედ ამ ამბის წაკითხვამ გადააწყვეტინოს ვინმეს გამოკვლევაზე წასვლა და ეს გადაწყვეტილება მისთვისაც გადამწყვეტი აღმოჩნდეს!
სტატია მომზადებულია ჩეხეთის განვითარების სააგენტოს მიერ მხარდაჭერილი პროექტის „კიბოს პრევენცია და ზრუნვის გაუმჯობესება საქართველოში“ ფარგლებში. პროექტი ხორციელდება „ჩეხეთის რესპუბლიკის კარიტასის” მიერ, დაავადებათა კონტროლისა და საზოგადოებრივი ჯანმრთელობის ეროვნულ ცენტრსა (NCDC) და ა(ა)იპ „საქართველოს ჯანმრთელობის ფედერაციასთან“ თანამშრომლობით.
