25 ნოემბერს, ქარელის მუნიციპალიტეტის მერიაში დაავადებათა კონტროლისა და საზოგადოებრივი ჯანმრთელობის ეროვნული ცენტრის, კიბოს სკრინინგის საკითხებზე მოსახლეობის საგანმანათლებლო და ცნობიერების ამაღლების ეროვნული კამპანიის ფარგლებში საინფორმაციო შეხვედრა გაიმართა.
პარალელურად საქართველოს კლინიკების ქარელის ჰოსპიტალში ნიქოზის პირველადი ჯანდაცვის ცენტრთან თანამშრომლობით სკრინინგ აქცია მიმდინარეობდა.
ქარელის მოსახლეობას შესაძლებლობა მიეცა მთელი დღის განმავლობაში სახელმწიფო პროგრამის ფარგლებში ძუძუს, საშვილოსნოს ყელისა და მსხვილი ნაწლავის კიბოს სკრინინგული გამოკვლევებით უფასოდ ესარგებლა.
საინფორმაციო შეხვედრაზე საუბარი შეეხო სკრინინგის სახელმწიფო პროგრამას, სკრინინგის მოცვის მაჩვენებელს, სკრინინგისა და ადრეული დიაგნოსტიკის როლს წარმატებულ მკურნალობაში და აპვ ვაქცინაციის როლს საშვილოსნოს ყელის კიბოს პრევენციის საქმეში.
საინფორმაციო შეხვედრა და სკრინინგ აქცია ქარელში დაავადებათა კონტროლისა და საზოგადოებრივი ჯანმრთელობის ეროვნული ცენტრის, კიბოს სკრინინგის საკითხებზე მოსახლეობის საგანმანათლებლო და ცნობიერების ამაღლების ეროვნული კამპანიის ეგიდით,
საქართველოს ჯანმრთელობის ფედერაციის ორგანიზებითა და ქარელის მუნიციპალიტეტის მერიასთან, საზოგადოებრივ ჯანდაცვის ცენტრთან, ნიქოზის პირველადი ჯანდაცვის ცენტრთან, საქართველოს კლინიკების ქარელის ჰოსპიტალთან და ოჯახის ექიმებთან თანამშრომლობით ჩატარდა.
