14 ნოემბერს 14:00 საათზე დაავადებათა კონტროლისა და საზოგადოებრივი ჯანმრთელობის ეროვნული ცენტრის „სისხლის უანგარო რეგულარული დონორობის მხარდაჭერისა და მოზიდვის ეროვნული კამპანიის ფარგლებში“ პარტნიორი ორგანიზაციის „საქართველოს ჯანმრთელობის ფედერაციის“ ორგანიზებით საქართველოს ტექნიკურ უნივერსიტეტში სტუდენტური თვითმმართველობის ხელმძღვანელობასთან და უნივერსიტეტის სტუდენტებთან მასშტაბური საინფორმაციო შეხვედრა გაიმართა.
შეხვედრის მონაწილეებს ჰემატოლოგ-ტრანფუზიოლოგი, კამპანიის ექსპერტი მაია ბეროძე სისხლის უანგარო დონაციის მნიშვნელობისა და საჭიროების შესახებ ესაუბრა.
დამსწრე აუდიტორიას ეროვნული კამპანიის მიზნებისა და სისხლის ახალი სისტემის შესახებ “საქართველოს ჯანმრთელობის ფედერაციის” დირექტორმა მეგი საჯაიამ და თბილისის სახელმწიფო სამედიცინო უნივერსიტეტის სტუდენტური თვითმმართველობის პრეზიდენტმა ლადო გაბეჩავამ მიაწოდა ინფორმაცია.
სტუდენტებმა მონაწილეობა მიიღეს ეროვნული კამპანიის ფარგლებში დაგეგმილ სისხლის უანგარო დონაციის ბარიერების კვლევაში.
ამავდროულად საქართველოს ტექნიკური უნივერსიტეტის სტუდენტებმა მიიღეს თბილისის სახელმწიფო სამედიცინო უნივერსიტეტის სტუდენტების გამოწვევა და ჩაერთვებიან სისხლის უანგარო დონაციის აქციაში, რომელიც 15 ნოემბერს საქართველოს ტექნიკურ უნივერსიტეტის მეექვსე კორპუსში 11:00 დან 15:00 საათამდე გაიმართება.
